موت عائلي -علي الدمشاوي

موت عائلي

علي الدمشاوي - مصر

-1-

  نايم و المنبّه الجوّاني صاحي بيجبرك تفتح عينيك كل خمس دقايق عشان تبحلق لأحلامك و هي بتتبخر من دماغك باتجاه السقف أو تبلع ريقك أو تعدّل وضع جسمك ع السرير أو حتى تمثل نظرة ساخطة على ايد الممرضة المؤلمة  اللي بتغير كانيونة المحلول أو تسأل الطبيب السخيف عن آخر معاد للموت .

-2-

ما عدا أمك فإن كل الواقفين في بلكونة المستشفى مش حاسين بتقل وقع صوت العربيات على روحك و لا بسخطك على سخافة تكرار الشوارع حوالين المستشفى من غير سبب إلا الإصرار على تكديرك ،

وحدها أمك تقدر تحس حاجة قدام غبار الأحلام الخارج من شفايفك في هلوستك الواهنة من تأثير المخدر الطبي.

-3-

الطبيب المخلص كل ما هيلاحظ إنك فقت هييجي يرص مجموعة جمل النصايح حوالين أهمية امتناعك عن التدخين و الانفعال و الشعر و هيستخدم عبارة ( طبعا انت فاهم ) كلازمة لكلامه ؛

فيفكرك برغبتك في القيء قصاد قصايد العامية التقليدية ؛

فتندر بينك و بين نفسك إنك و انت خارج من هنا هتوقف نعشك قدام مكتبه الفخم و تولع سيجارة فرط من جيب الكفن و تسحب نفس عميق تنفخه ف وشه و تقول :

-        طبعا انت فاهم يا دكتور!

-4-

مسابقة التدخين اللي داخلها مع الشركة الشرقية للدخان هتنتهي بانتصار طرف تالت ، و هتفضل الشركة تنتج اكتر ما انت بتدخن فتصاب بالإحباط في قبرك .

-5-

سخريتك من كل الموجود حواليك بالصدفة هتسيبك زي ما سابت كل جدودك على أول درجة في مدافن العيلة .

و بعد ما ينهوا دعاء التثبيت ؛

هيقوم ابوك وجدك و أعمامك يرحبوا بيك؛كل واحد منهم هيستعرض لفافات السخرية و الدخان اللي قدر يهربها من طابور التفتيش الطويل ( الطبيب-المغسل-المعزين و الملايكة ) ؛

و في الليل لما يتبرع واحد منهم بسرد حكاية موتهم هتلاحظ إن طريقة موتك كانت مجرد تقليد عائلي فتضيعوا في هسترية ضحك !

-6-

بعض الميتين الجيران الجدد هيشتكوا من ضجة قبركم ؛ فيشاور جدك بضرورة خفض الصوت و ضبط و النفس فيضحك ابوك على سيرة ضبط النفس اللي هتفكره بنكسة 67 .

-7-

قريب جدا و لما ييجي ابنك يزورك للمرة التانية و جايز الأخيرة هتضطروا تتصنعوا هدوء الموتى علشان ما تشوشروش أفكار الولد عن الموت .

. . .

الولد المذهول المتسمر على باب القبر بيقرا الفاتحة و شيء من سورة مريم مش حاسس أي حاجة !

لكن لحظة ما يدي ضهره للقبر و وشه للعالم اللي ما فيهوش حد منكم هيبدأ نوبة بكا ربنا وحده اللي يعلم امتى هتنتهي !

-8-

ابوك لما يسمع النبؤة دي هيقول :

-        يابني فيه فرق بين التنبؤ بسلوك ابنك مع جثتك و قراية تاريخك السخيف مع موت ابوك!

 جايز ابنك يبطل بكا قبل ما يدخل القبر ده

-9-

مش قادر ابطل كتابة في الموضوع ده ؛ الكتابة في الموت و البكا فعلين عارف مرافقيني من مولدي لمماتي !